مش عارف تخش قسم ايه؟؟؟؟؟؟؟؟

- عمارة:
1. قسم عمارة دة بقى قسم البنات او الاولاد اللى بيحبوا يقعدوا وسط البنات...!!!! او المواهب طبعا...
2. القسم دة بنسميه تجارة هندسة علشان محدش بيسقط فية ولا حتى بيشيل
مادة..... دة اللى بيجيب جيد....جيييد... بيعيط..!!!! ودة ميزة للى عايز
ينجز و يخلص.
3. طبعا القسم دة المذاكرة فية قليلة خالص بس المجهود البدنى فية عالى
جدا... يعنى لو كنتى بتاعة بابى و مامى ونونو.. متفكريش فى القسم دة خالص
4. يعنى ممكن ايام المشاريع تقعدى شغالة مثلا لغاية 11 ليلافى الكلية و الكلام دة كان بيحصل على يدى وانا مش بكبر الموضوع
5. لو عندك حس فنى و قدرة على الابتكار ادخل القسم دة على طوول... و لو
عايز تدخلوا منظرة او علشان تفرح بالمسطرة اللى حتكون اطول منك ...بلاش..
مش حتسقط حتنجح برضة و حتجيب جيد.... بس حتتخرج من الكلية علشان تقف على
"عمارة" تحرسها -بواب يعنى-
6. عيب القسم دة انه مجال عمله لا يسمح بوجود انصاف المواهب... يعنى لو
عندك موهبة حتطلع تشتغل فى احسن الاماكن و بمرتبات خرافية.. بس لو موهبتك
عادية حتشتغل بقرشين....

7. مواد القسم اغلبها رسم و مواد من قسم مدنى وهى مواد تتعلق بخصائص المواد و الانشائات و المساحة وحاجات بسيطة و لذيذة
8 - لازم تعملوا حاجة عندنا في الكلية اسمها قدرات اسمع عنها بس مجربتهاش
- مـــدنـى:

1. القسم دة بقى جمع المعادلة الصعبة ومسك العصاية من النص...يعنى لا هوة
صعب قوي زي ميكانيكا وكهرباء ولا هوة سهل اوى زى عمارة.....لا مجال عمله
واسع اوى زى ميكانيكا و كهرباء و لا ضيق زى عمارة...و دى ميزة للى بيحب
المعقول
2. القسم دة مشكلتوا ان تسليم الشيتات بيكون تقريبا اسبوعى طول السنة
3. و المواد فية كلها بقى خرسانة و طبيعة مواد و سدود و سكك حديد و مساحة و هندسة انشائية....
4. الفرق بين المهندس المعماري و المدنى ان الاول بيرسم و التانى بينفذ .... يعنى الاثنين بيسلموا لبعض
5.مجال شغلة مش بطال بس فية سنة بهدلة شوية
6. واللى نفسة يبنى عمارات و سدود و كباري و انفاق يدخل مدنى على طوول
7- لازم اللي يدخل مدني يعرف ان حياته هتكون بين الطوب والرمل والأسمنت والحديد وهيقعد يدعي علي أحمد عز كل ما الحديد سعره يزيد
- اتصالات:
1. لو حابب اتصالات و عايز تتدخلها و عندك حد يشغلك برة مصر....تبقى عبيط
لو مدخلتهاش..... اما لو حتفضل جوا مصر فلازم تعرف ان مجال اتصالات ضيق
للغاية و يكاد يكون منحصر فى شركات الاتصالات و المحمول و البترول فقط....
وشوف بقى كام الف مهندس اتصالات بيتخرج...
2. مواد اتصالات تشبة مواد كهرباء اوى لان اتصالات جزء من كهرباء اصلا ...
3. اغلب مهندسين الاتصالات فى مصر بيشتغلوا فى الاخر يا اما مهندسين
كهرباء او مهندسين كمبيوتر .... طيب ما تدخل كهرباء او كمبيوتر من الاول و
لخص....
- انتاج:
1.طبعا مجال الانتاج دة من اكثر المجالات الرهيبة جدا و اللى مش اى حد
شغال فيها و مرتباتها عالية جدا طبعا لو طلعت مهندس فاهم و حتبقى استشارى
فى حدود 7 سنين من تخرجك
2.ولازم تعرف ان انتاج اصعب قسم فيكى يا هندسة على الاطلاق..... وانك احتمال 85% حتسقط سنة ولا اثنين فى النص
3. الدراسة فية طبعا شبيهه بدراسة ميكانيكا ولكن مع تركيز كبير على مجال
الانتاج....يعنى 50% من القسم ميكانيكا و 50% انتاج..... والانتاج هوة
بالضبط اللى اخذتوه فى اعدادي بس بتوسع
4. مجال العمل يكون فى المصانع و تشغيل الماكينات فى الورش الصناعية الكبيرة و احيانا فى مجال تاكيد الجودة.
5.وفي الاخر هتتطلع من القسم ده مهندس جودة ومهندس مراقبة حاجة زي كده مش متأكد قوي.
5. عيب القسم ده :: الدكاترة يعني هتلاقي مواهب امتحانات اوبن بووك " open
book" وكلوسد بووك وحاجات غريبة ودكاترة غريبة وتلاقي الدكتور وابن
الدكتور وعم الدكتور وابن عم الدكتور كلهم دكاااااااترة في القسم واحفادهم
معيدين علي وش دكترة .
وربنا يتولا اللي يدخل القسم ده
- كهرباء:
1.مهندس الكهرباء بيستلم من مهندس اميكانيكا و من المجالات اللى مجال شغلها واسع جدا زي ميكانيكا
2. مواضيع دراستها تتلخص فى كل ما يخص الكهرباء و قليل من
الالكترونيات.... يعنى لو مش فاهم كهربية اعدادى او حاسس انها تقيلة على
قلبك.... اياك تدخل قسم كهرباء يااما للاسف ممكن ماتطلعش منه..!!!
3.حيكون نطاق عملك فى كل حاجة و اي شركة هندسية حتكون فيها مهندس كهرباء
4. انا عمرى ما كرهت فى حياتى قد مادة الكهرباء

- طبية:
1. وبتاخد اصحاب التقديرات المرتفعة يعني من امتياز وانتا نازل ومش هتنزل عن الجيد جدا يعني زي حاسبات كده
2.طبية هى عبارة عن خليط من مواد قسم ميكانيكا على كهرباء.... وقسم طبعا
مش سهل...بس طبعا كلامى دة ميفرقش كتيير مع اللى حيدخلوا... دة حيكون من
المتفوقين.....يعنى ياكل الزلط
3. طبعا مفيش غير حلوان و القاهرة اللى فيهم طبية يعنى اقل من 100 مهندس طبية كل سنة بيتخرج و دى طبعا ميزة
5.طبعا مفيش كلام على القسم.... بس واللى تجيلوا و مايدخلش يبقى عبيط.... بس ورينى يا حدق انت و هية حتجيبوا مجموعها ازاى
- كيمياء:
1. اولا القسم دة موجود فى القاهرة و فى اسكندرية....
2. قسم انا شايف انة مالوش مستقبل لانك لا حصلت مهندس بترول و ولا جبت
علوم قسم كمياء.... يعنى ممكن تدرس كمياء فى مدرسة خاصة لما تتخرج.
3.مواد دراسته تتلخص فى كتاب الكمياء اللى تخذته فى اعداداى حتلاقية بقدرة
قادر بقى مواد و كورسات و كتب و اتمط و اتوسع و بدل ما حتخده فى ترم حتدره
فى اربع سنين ...
- نووية:
1. القسم دة موجود فى هندسة الاسكندرية فقط....
2.طبعا قسم حكاية و رواية وشوف بقى المجال النووى والذرى فى العالم وصل لغاية فين فى جميع المجالات
3.لما تتخرج من القسم دة حتلاقى مستقبل مشرق فى المكان الوحيد اللى بيشغل
بتوع الذرات فى مصر - مع الاعتذار لجورج سيدهم - الا و هو المركز القومى
للطاقة النووية و طبعا مرتب رهيب حوالى173 جنيها و لما تتجوز حيراعوا دة
وحيزودوك حوال 6 جنية وعلي كل عيل حوال 2 جنيه ولو كان العيل بنت هياخدوا
منك 2 جنيه.
4. اما لوحتسافر برة بالتحديد امريكا انسى بقى مصر لانهم مش حيخلوك تشفها
تانى بس روح بقى هناك و تبقى عالم كبير و مش بعيد تعمل قنبلة نووية.... بس
لما تقف على ديلك مش حترجع مصر تانى
5. مجال دراستها ينحصر فى الفيزياء الكلاسيكية -اللى زى اللى درستها فى اولى ثانوي- و الفيزياء الحديثة

-هندسة الكترونية:
1. مش موجودة غير فى المنوفية.
2. كل اللى اعرفهم اتخرجوا منها قاعدين على القهاوى... مش لان المجال وحش بس لانهم بيعملوهم و بيدرسوهم كانهم فنيين مش مهندسين
3.يعنى لو بتحب قعدة القهوة ياخي روح اقعد عليها من دلوقتى و متوجعش دماغك.

- طيران:
1. موجودة فى القاهرة فقط.
2. قسم من الاقسام الداخلية لميكانيكا وطبعا مجال جامد و برستيج عالى جدا
3. ممكن تدخل ميكانيكا و تخلص و تعمل دبلومة فى الطيران و تبقى مهندس طيران قد الدنيا
4. نفس دراسة ميكانيكا بس مع التركيز على الايرو ديناميك بشدة..
يا رب تكونوا استفادتوا من الموضوع و يكون مساعد ليك او ليكى فى اختيار القسم.....